عدم العدل بين الابناء

قصه. منقوله
انا اب لشابين اكبرهم 28 سنه واصغرهم 25 سنه
هحكيلكم حكايتي واتمني محدش يدعي عليا....
انا اول ما خلفت جبت ابني الكبير احمد كانت روحي فيه كأن جاتلي حته من السما .
  كنت بزعل مراتي نفسها عشانه سبحان الله زرع جوايا حب غريب لابني ده
مرت الايام والشهور والسنين وخلفت ابني التاني محمد
كنت بقول جوايا مش هحب غير احمد ومكنتش حتي بشيل ابني الصغير خالص
اي مشوار اخد الكبير معايا ولاغي ابني الصغير
  مراتي كانت بتعامل الاتنين زي بعض وانا كنت اقول دي مش بتفهم خصوصا ان ابني الصغير كان شقي جدا ولا يطاق بس انا مكنتش فاهم اني طبيعة الاطفال لان ابني الكبير كان هادي
مش فاكر ولا مره حتي قعدت جنب ابني الصغير وهو عيان ولا حتي  روحت معاه لدكتور لكن ابني الكبير لو بس قال اه كنت بحس بوجعه
المهم كبرو الاتنين  ابني الكبير بقا محاسب قد الدنيا والصغير دخل معهد حتي بالنسبالي فاشل في التعليم
  بسبب اسلوبي كرهت ابني الكبير في اخوه
فضلنا نعامل ابني الصغير علي انه  تافه وفاشل وميصلح يكون ابن
  وصل بيا الحال انه لما اتخانق مع اخوه الكبير عشان  رفع ايده عليه فانا دمي فار ازاي الصغير يرفع ايده علي الكبير  لاقيت نفسي بضربه بغباء  وطرده من البيت مراتي جايه تجري وراه حلفت عليها بالطلاق رجع باسها وقالها ادعيلي ومتقلقيش عليا  وقالي ابنك ده مش كويس ده وش ملاك وقلب شيطان فضلت اشتم فيه وكنت زي الاعمي عن عيوب ابني الكبير
ابني الصغير لما طردته راح عاش مع ابويا وامي اللي انا اصلا مكنتش بسأل فيهم ودرس علوم شرعيه وحفظ القرأن بالقراءات العشر  والتحي فضلت 4 سنوات مشوفوش
في الفتره دي اتبدل ومكنتش اعرف عنه حاجه ومحستش اني عايز اشوفو
  المهم ابني الكبير اتجوز واحده اهلها ايييه يشرفو
بس مش عايز اقول لكم كوبايه الميه لو بموت قدامها مبتشلهاش عشان تشربني
  مراتي تعبت لاني مانعها عن ابنها الصغير وفضلت فتره مبتقدرش تمشي مكنتش حتي بتناولها العلاج وجيت اشتكل لابني  رد وقالي هي مش ملزمه تخدمكم وانا مش فاضي
كنا في رمضان اللي فات  بعد الساعه 1 بالليل الكلام ده خرجت من البيت مزهول طلعت ع المسجد فضلت اصلي لحد ما اقامو الفجر لاقيت واحد بيصلي بينا صوته جمييييل اوي  اول مره في حياتي اعيط من صوت حد  اول مره احس بخشوع في الصلاه 
بعد الصلاه قعدت اعيط لاقيته قرب عليا و وكان ملتحي كده ووشه جميل  وراح حاضني معرفش ليه مسكت فيه واحضنه واعيط   بس بشبه عليه اوي
لاقته بيقولي وحشتني يابابا !!!
_بابا!!!
قالي انا  محمد انت معرفتنيش؟
ابني اللي كنت بقول عليه فاشل بقا بيصلي بينا وبيخليني اعيط من صوته ؟
ابني اللي كنت بقول عليه شيطان طلع ملاك في هيئة بشر؟
ابني اللي انا عاقيته بيبرني؟
خدني معاه وروحت عند امي مكنتش بذورها خالص والله
لاقيت امي نايمه وابويا مريض وهو بيرعاهم وبيت ابويا اتغير ونضف ومبني دور تاني
في حاجه غريبه
الصبح لاقيت بنت حلوه بتصحيني وتقولي منورنا يابابا بقولها انتي مين قالت انا مرات محمد!!
خدت امي وحمتها وغيرت ليها وحطتت ليها معطر
وادت ابويا العلاج ووجابت له ميه يتوضأ وبقت تدلع فيه  وتضحكه وانا قاعد عايز اضرب نفسي بالجزمه اني سيبت كل ده
لاقيت ابويا بينادي عليا ويقولي تعالي ياواد عاوز احضنك قبل ما اموت
كنت مفكره زعلان مني  قالي مش زعلان مهو محمد قالي ان انت اللي بعته لينا ياخد باله مننا عشان انت سافرت شويه وكتر خيرك علي الفلوس اللي كنت بتبعتها لينا
انا قاعد متنح وشويه ولاقيت ابني داخل بالخضار والاكل وبيعطيهم لمراته ويقولها اعملي احلي اكل لبابا
كنت بضحك وبعيط وقلتله امك هتموت عشانك قالي هاخدك تدخل تجيبها عشان حلفانك  وتفطرو معانا 
لاقيت ابويا بيقولي  طالما رجعت تعالي عيش معايا  مهو كله من خيرك
خدت ابني بره وحكيت له كل اللي حصل  لاقيته عارف كل حاجه  قالي هات هدومك انت وامي وتعالي
انا وافقت وجيت وامه شافته ردت فيها الروح وعايش معاهم من سنه مراته شيلانا علي كفوف الراحه لو طالت تأكلنا هي هتعملها
هي حامل في تؤام ادعولها
انا حكيت كل ده عشان افضفض عن اللي جوايا   وياريت لو في حاجه اقدر اكافأ ابني بيها حد يقولي لاني قلتله اكتبلك كل املاكي رفض وقالي محدش مننا هينفعك في قبرك
سيب كل حاجه زي ماهي
وابني الكبير مسألش عننا ولا حتي قالي انت مشيت ليه
ولما ناس راحولو قالهم براحته محدش ضربو علي ايدو
###############
ياريت كل اب وكل ام يخلو بالهم من التفرقه بين ولادهم بتربي كره كبييييير
وحقد   وفكر ان ممكن ابنك اللي قسيت عليه يكون هو اقرب ليك من اللي بتحن عليه